Envío gratuíto a partir de 100€
Esta semana celébrase a IV Edición do Festival Espírito Ribeiro, un Festival de Sabores, Música, Viño e Produto de proximidade.
Presentouse a semana pasada na Casa de Galicia en Madrid.
En Adegas Celme xa temos todo preparado para desfrutar con vós o sábado 29 de xuño en Castrelo de Miño.
Unha xornada chea de actividades e experiencias como música, gastronomía e viño!
Será a ocasión perfecta para vernos un ano máis e que desfrutedes dos nosos viños e vermús artesanais, que sabemos que vos encantan, nun ambiente extraordinario!
Ademais teremos a última incorporación ao noso catálogo de viños, que presentamos na anterior Feira de Viño do Ribeiro, e que tamén levaremos ao Espírito Ribeiro para que probedes: O Celme do 24, un viño branco monovarietal de Godello que non deixa de darnos alegrías.
Desfrutade da programación de concertos con calquera dos nosos viños e Celmús.
Un Celmú será unha moi boa opción para empezar a xornada e acompañar ás crianzas no concerto de Uxía Lambona e a Banda Molona (18:00h), unha banda de música infantil que recolle os clásicos populares galegos co seu toque particular, facendo que os nenos sexan partícipes, cheo de bailes, xogos, coreografías e sempre con algunha que outra sorpresa.
Despois virá o concerto de Pancho Varona (20:30h) que xa non precisa presentación e que marida á perfección con calquera dos nosos viños brancos.
Compositor, guitarrista e produtor destacado da escena musical española, man dereita durante anos de Joaquín Sabina e artífice de éxitos para outros grandes artistas como Ana Belén, Víctor Manuel, Luz Casal, Quique González ou Christina Rosenvinge. Pacho Varona será o embaixador desta edición 2024 do Espírito Ribeiro.
E para rematar, un Celme do Souto para bailar ao ritmo de The Bigüis (22:00h), unha banda viguesa que interpreta versións de rock clásico e alternativo, desde os icónicos The Beatles ata Franz Ferdinand, pasando por un pouco de pop. É a conxunción perfecta de humor, bo ambiente e moito rock and roll!
Agardámosvos o vindeiro sábado 29 de xuño en Castrelo de Miño para desfrutar desta cuarta edición do Festiva Espírito Ribeiro e darlle a benvida ao verán!
Aquí os horarios das actuacións en cada un dos Concellos participantes do Festival:
28 xuño. A ARNOIA
29 xuño. CASTRELO DE MIÑO
30 xuño. CENLLE (Campo do Cabalo de Laias)
